回憶是要自己創造的。: 越南峴港 DaNAnG 四天义電之旅

你聽過「峴港」未？好多人會講成「蜆港」, 其實佢正確讀音係「現」, 但係你同人講你去「現港」,更加冇人知你去邊度。

好吧，近三個月，無論雜誌抑或工作上的朋友都話要去峴港，去完既又話超正。得知係陽光海灘，順理順章成為我既目標之一。

喺香港，得港龍有直航，由於峴港係細機塲，所以機位「爆到七彩」。要玩盡四日早機去，晚機反，你只有一個選擇，就係七月加開的星期六早機，星期二夜晚十點到港。

六月頭開始睇，七、八月滿唒。上網睇cx package,有去程冇回程，本已死心。七月初，縱橫遊推出峴港四天團，仲要係我想住的洲際酒店，心諗thx god !! 點知出發前七日被通知唔成團，旅行社解釋係「酒店唔肯比房」。

雖然唔明點解「唔係傾好先出團？」,但我相信旅行社解釋，既然你話係酒店問題，你點都要放反十幾張機票出黎卦？！於是我又上cx package...真係有機位，但一定要選「較少限制之艙等附加費」 $160一位，雖然唔知咩黎，都要比！

但酒店始終要候補，但距離出發淨係四日，我真係心急了，因為未請假。

等左一日，落實了。

又要趕，趕咩？趕！簽！證！呀！

持特區護照，需時三日，同埋五百個大洋，好貴呀。

簽！證！是！可！以！叫！人！代！辦！的！

Cx package :

2 位成人

3 晚套票價格 $4,430x 2 = $8,860

較少限制之艙等附加費 $160x 2 = $320

稅項及燃油附加費 $645x 2 = $1,290

小計 $10,470

總額港幣$10,470

香港旅遊業議會認可手續費$60

總額港幣$10,530

Visa : $500x2 = $1000

出發前基本消費 : $11,530

由於太即興，上網峴港自由行資料近乎「零」,我拎住本新假期就上機了。
冇時間睇行程，book車，因為只想hea下，訓下。

到達峴港才是當地早上9:00 (峴港慢香港一小時) , 喺機塲外面唱錢同叫的士。

提提大家要先唱定美金。

找換店可代叫的士，加上寫明機塲至洲際酒店為308,410，就叫店員代勞。未幾，外面就有人高呼你的名字，同你上車。

車程約半小時多啲，但落車一下，佢話by meter350,000 其實相差HKD30之嘛，但明明講好價錢先上車，點可以又變。最神奇，此時有個識講廣東話的當地女人 (非酒店職員) 主動走出黎翻譯，同埋強調司機話冇傾過價錢，一定要按錶收費，又叫我地比多啲個司機。

算！出黎旅行都係想開心，我地比！但大家要小心，因為聽講部分咪錶會不正常的狂跳。